Thursday, January 26, 2006

عمالة الأطفال ..



فى الشغل عندى فيه واحده ست بتشتغل فى النظافه هنسميها سيده .. دلوقت سيده عندها ولدين توأم فى سادسة إبتدائى
الأولاد مالهمومش فى التعليم و حتى مابيعرفوش يكتبوا .. غالبا كده مش هيكملوا فى المدرسه سنه سنتين كمان ( ده لو نجحوا أصلا فى سادسة إبتدائى ) .. طبقا لكلام سيده مابيعرفوش أصلا يقروا ولو حتى اساميهم !
يا ترى من المقدمه دى و من عنوان الموضوع تخيلتوا الصوره ؟ صورة طفل برئ إضطرته الظروف الوحشيه إنه يشتغل بليه عند اسطى ما بيرحمش .. بينام كل يوم دمعته على خده و بينظر للأطفال التانيين و هما رايحيين المدارس و بيلعبوا مبسوطين. أكيد كلكم شفتوا المنظر ده فى فلمين تلاته أو فى إعلان على التلفزيون عنوانه "الطفوله المشرده"
بس مش دى مش الصوره إللى أنا عايز أنقلها ....
أولاد سيده راحوا من نفسهم لأسطوات فى حتتهم و طلبوا يشتغلوا معاهم .. دول حتى إتفقوا على اليوميه و عملوا مفاوضات (الأسطى كان عايز يديهم 10 جنيه فى الإسبوع بس هما مرضوش بأقل من 15)
جات لنا سيده فى يوم بنسألها عن ولادها أخبارهم إيه (عشقى للأطفال ماهواش سر حتى فى الشغل !!!) قالت لنا "ده أنا إمبارح روحت البيت مالقيتهمش .. فضلت دايخه عليهم أسأل العيال إللى بيلعبوا معاهم قالولى راحوا من هناك .. رحت لقيهم كل واحد واقف فى الورشه بتاعته" حكت لنا سيده برضه أد إيه إن الأسطوات مبسوطين منهم , اسطى بيقول (نقلا عن سيده) إن إبنها ذكى و لماح جدا. خلاص فى يومين حفظ كل المفكات و مقاساتها (ده نفس إللى ماكنش عارف يقرا) سيده بتقول أنها زعقتلهم عشان سابوا البيت من غير إذنها و لكن واضح إنها فخوره بأولادها و نضجهم المبكر .. رغم إن موقفها الرسمى انهم لازم يكملوا تعليمهم "على الاقل لحد ما يعرفوا يقروا" لكن بصراحه ماهو كده كده العيال هتخرج فى الشارع فالشغل أحسن كتير من الصياعه (ده رايها و رأيى أنا كمان)
سيده حكيت لنا كمان عن إزاى ولد منهم جالها فى يوم و معاه تلاته أربعه جنيه من يوميته و سألها لو كانت بتعدى على السوق و هى مروحه و طلب منها أنها تجيب لهم "كام كيلو يستفندى كده" .. بإختصار كده الراجل الصغير بأه واد كسيب دلوقت و بيفنجر على البيت
بالمناسبه الأولاد دول واحد شغال فى ورشة سمكره و التانى ورشه ميكانيكى .. أى حد عنده عربيه يعرف إن الحرفتين دول لهم مستقبل أحسن من أحسنها دكتوراه ! أنا شخصيا بأعتبر السمكريه من الفنانين و السمكره صوره من صور الفن لا تقل مكانه عن النحت و الرسم بالزيت.
ده خلانى أفكر فى موضوع عمالة الأطفال , كتير أوى من المنظمات العالميه و المحليه بتنظر له على إنه من أقسى صور إستغلال الأطفال .. بس ياترى ده صحيح ؟ أكيد فيه أمثله من عمالة الأطفال بتمثل أسوأ معامله لإنسان (أيوه .. أنا برضه بأقرأ تقارير الأمم المتحده و اليونيسيف) و لكن أظن إن فيه أمثله أخرى فيها عمالة الأطفال خير و فايده ليهم. لما نظام التعليم يكون فاشل و بيغرق (إزاى طفل يوصل لسادسه من غير ما يعرف يقرأ ؟؟) و الورش بتقدم تعليم حرفى ممتاز (لا مناهج و لا إمتحانات و تهريج الوزاره) ده غير إن فكرة الشغل نفسها بتبنى أخلاقيات كتير مهمه. لما العائلات تبقى فى فقر شديد و اليوميه دى هتساعد فعلا (بصوا كمان للطفل و تقديره لذاته إللى هيوصل للسما لما يساعد عيلته) , لما يبقى الخيار التانى الشارع و أصدقاء السوء و المخدرات هنلاقى إن عمالة الأطفال ممكن تبقى حل ممتاز .. مش مشكله.
دلوقت لما ألاقى حد فى الإعلان العالمى لحقوق الطفل أو أى حاجه مشابهه بطالب بإلغاء عماله الأطفال بأضحك .. ده واحد مش عايش فى الواقع. أو على الاقل محتاج يقابل أولاد سيده .. ماهو يعنى المدارس المصريه مابتحرمش الأطفال من طفولتهم ؟؟ أنا واحد بأعتبر إنه تم إسائة معاملتى فى طفولتى من وزارة التربيه و التعليم بصوره عامه و من مدرستى الإبتدائيه بصوره خاصه.
دلوقت إللى بأحلم بيه هو شبه نقابه للأطفال العاملين .. حاجه تضمن معاملتهم معامله جيده. أما حكايه "إلغاء عمالة الأطفال" دى فأنا مش معاها .. لو أى حد يا جماعه عنده فكره عن نشاظ زى النقابه دى ياريت يقول لى.
مع كل الحب
مراسلكم من صحراء العبور
شيرو

4 Comments:

Anonymous Anonymous said...

dear shiro, great one acually the side is great, consider putting this one on the magazine blog,
love rasha.

2:54 PM  
Blogger لـيـلـيـت said...

اشمعني اسم سيدة يعني
نحن لا نزرع الشوك .. برضه البنية اسمها سيدة

ارحموا البت بقى

5:06 PM  
Blogger shiro said...

الحقيقه أنا إخترت إسم سيده عن قصد
طبعا المقارنه واضحه بين حكاية نحن لا نزرع الشوك و حكايتى
على أى حال نورتى المدونه يا ليليت

1:02 AM  
Anonymous Anonymous said...

Very nice site! » » »

8:29 AM  

Post a Comment

Links to this post:

Create a Link

<< Home