تقريرى عن معرض الكتاب

زرت أخيرا معرض الكتاب !! حاولت أزوره مره من قبل بس صادف إن فى اليوم ده قرروا يفتتحوا بطولة الأمم الأفريقيه .. و الصدفه الغريبه أنهم قرروا كمان أنهم يقفلوا المعرض فى اليوم ده .. المهم بدأت رحلة الذهاب كلاكيت تانى مره مستغلا فرصة أجازة رأس السنه الهجريه (كل سنه و أنتم طيبيين) و الحمد لله المره دى مافيش حد من بتوع الأمن قرر إنه يقفل المعرض , لم أهاب جحافل البشر الرهيبه التى تقف لقطع التذاكر و لا الاعداد المهوله الواقفه فى طابور يسد عين الشمس عشان تدخل (المثقفين لسه بخير .. طب كويس) بعد الإنتظار الطويل دخلت أخيرا من باب الجنه .. أقصد باب المعرض و أكتشف إن سبب الزحمه دى هو إصرار رجال الأمن الأشداء على دخول الناس واحد واحد و ده كله عشان يعدوهم فى جهاز كشف المعادن منظره بايظ و مش شغال قاعد جانبه واحد باين عليه مش فارقه معاه .. أهو ماخدتش فى بالى .. لسه حرقة الدم إللى صح هاتيجى لما أشوف الكتب إللى جوه و أسعارها الممتازه.
ناس كتير كتير كتير و دور نشر أكتر و أكتر و أكتر .. بس انا فيه حاجات محدده عايز اجيبها .. "the alchimest" أو أى حاجه تانيه لنفس المؤلف .. حاجه لشكسبير و لو قيت حاجه تانيه مثيره للإهتمام .. ده غير أبويا موصينى أجيبله عملات من دار صك العمله و أختى أكيد هتعوز مجلات teenstuff العيالى دى
دخلت كذا دور نشر ورا بعض .. الأماكن زحمه أوى , ايام ماكنت طالب كنت بأتحاشى أيام الأجازات دى لكن دلوقت بما إننى من العاملين ماعدش غير الأجازات عشان أروح. لاحظت كترة كتب "ساعد نفسك" self help على نغمة "كيف تحقق السعاده لنفسك" أو "تغلب على الكسل و إنطلق نحو المش-عارف-إيه" أنا عمرى مابلعت الكتب دى أو حبيتها .. لو السعاده و الراحه سهلين أوى كده ماكنش حد تعب .. على أى حال واضح إن كتير بيشتروها لدرجه إنه متهيألى ماعدش حد مش عارف يساعد نفسه غيرى
بعد شويه إبتديت ألاقى كتب الفلسفه عجبنى كتاب بيتكلم عن محاورات أفلاطون عن الفضيله (أو بالأصح عجبنى سعره 10 جنيه بس) بس أظن إنه عندى فى مكان ما. لقيت برضه السيره الهلاليه بتاعة الأبنودى. أهو ده كتاب يستحق أشتريه. بس فى الآخر إشتريت ديوان صغير للأبنودى إسمه "أحمد إسماعين" قلت أجرب فيه نفسى فى الأول مع شعر الأبنودى. جبت كمان كتاب من إصدارات مركز إبن خلدون عن الأفليات العربيه و أحوالها فى عام 2000 (هو المركز إتقفل من شويه ؟؟) .. أبويا العزيز أكيد هيهتم بالكتاب ده.
شويه و أنا ماشى لقيت كتاب هارى بوتر بالعربى إشتريته على طول كهديه لأحد أصدقائى .. أخدت مع الكتاب هديه إسطوانه من إياهم مليانه العاب بس خايف أجربها على جهازى العزيز
مريت مجموعة كتب بتهاجم المسيحيه (إنها مأخوزه من الوثنيه , تحريف الإنجيل , ....) تصفحتها بإهتمام الغريبه إن واضح إن المؤلف مالهوش مهمه فى الحياه إلا النوعيه دى من الكتب (مش باحث تاريخى بصوره عامه) .. ياترى ممكن حد يثق فى مصداقية شخص زى دة ؟؟ مش عارف ليه سيرة الدنمارك جت على بالى و تسائلت هو ليه المسلمين بصوره عامه حساسين جدا لإسائه غيرهم لدينهم .. أما إسائة ناس منهم لأدايان غيرهم بتمر من غير ملاحظه. على أى حال أنا ماعنديش مشاكل "حرية الفكر" مالهاش غير معنى واحد و هو حرية الفكر بدون أى تحفظات
بعد كده دخلنا على سراى إطاليا .. و ما أدراك بسراى إطاليا حيث تجتمع معظم مكتبات الكتب الأجنبيه هناك .. بإختصار بأكون عايز أشترى نص السراى ده .. أول حاجه قابلتنى كانت الموسوعه البريطانيه. من طقوسى فى كل معرض أن أسأل عن سعرها "وصل كام السنه دى" (زى الطماطم بالظبط !) و بعد كده افضل واقف قدامها بأتخيل شكلها هيكون إزاى فى مكتبة أحلامى. سعرها السنه دى وصل لأكتر من 8000 جنيه .. بس فقدت بريقها بالنسبه لى بعد ما عرفت ويكيبيديا.هناك جنبها كان فيه حاجه تانيه بنفس السعر جننتنى .. سلسة الكتب العظيمه "great books". دى عباره عن اكترمن 60 كتاب فيهم أسماء كل ما تتخيله من المفكرين و الكتب المهمه فى تاريخ البشريه .. أسامى كتيير مافهمتش نصها بس باين عليها مهمه.
بعد ماسألت كذا واحد عن "the alchimist" أو "باولو كويلهو" و إستقبلت نظرات غريبه منهم أخيرا وجدت ضالتى .. أقصد واحد يفهمنى أما الكتاب فخلص إمبارح !! يعنى بتوع الأمم الأفريقيه دول لو كانوا سابونى يومها مش كان زمنا إشتريناه ؟؟ المهم أشتريت كتاب "by the river piedra i sat down and wept" و بدأت قراءته بالفعل. المهم صرفت نظرى عن شكسبير و منعت نفسى فى آخر لحظه من شراء "20 ألف فرسخ تحت البحر"بتاع جول فيرن .. قلت أجيبه من عند مشروع جاتنبرج أحسن. و أهو أنا أولى بالفلوس دى
رحت جناح المانيا و ضورت على الرجل الطاير إللى اخناتون قال عنه بس مالقيتوش .. كان فيه ناس بيبيعوا كاميرا فيديو تايوانى 11 ميجابيكسل بـ 1900 جنيه بس حاجه كده too-good-to-be-true أكيد الموضوع ده فيه حاجه
بعد كده مافضلش إلا دار صك العمله و المجلات .. غريبه أوى إنى عرفت ألاقى الدار لوحدى و بسرعه .. فى العاده أنا بتوه بسرعه و حاسة إتجاهاتى تحت الصفر .. المهم دخلت الدار و إشتريت كام جنيه فضه للسيد الوالد. كنت عايز أشترى بتاع عبد الحليم بس مارضوش إلا لو إشتريت معاه مجموعه غريبه ماعجبتنيش.
أخيرا مافضلش إلا teenstuff و دى فى سور الأزبكيه. الموضوع و مافيه إن أعداد السنين إللى فاتت بتنزل هناك الواحد بجنيه (يعنى كده أبو 8 جنيه سيادتك بتاخده بجنيه بس وقرب قرب) أنا شخصيا شايف إنه غلطان إللى يروح يشتريها و هى جديده .. يعنى هتفرق إيه ؟ أخبار الفنانين و الفنانات مش هتبقى "طازه" ؟ معلش مش مشكله !
جمعت سنه 2005 كلها إلا عددين .. بعد البحث إكتشفت أنهم بيتباعوا بسعر خاص 3 جنيه فركبنى العند و قلت بناقصهم. بس بعدين إكتشفت أن واحد منهم بتاع فيلم "هارى بوتر" الأخير و التانى بتاع أنجلينا بتاعة "توم رايدر" قلت يلا معلش عشان خاطر عيون الست لارا و الواد هارى أجيبهم .. يالا
و أنا خلاص ماشى لقيت إعلان بيقول إن "محمد سلماوى" جوه بيوقع على آخر كتبه .. الإسم مش غريب على بس أنا ماعرفوش و مش فارق أوى معايا .. بس قلت الراجل كلف نفسه لحد هنا عشان يمضيلى على كتابه .. تبقى قلة أدب لو ما سلمتش عليه على الأقل. ده غير إن عمرى ماشفت لقآت توقيع الكتب دى إلا فى الأفلام الأجنبيه
الكتاب نفسه ترجمه لرواية "مسيو إبراهيم و زهور القرآن", بتحكى عن علاقة حب بين كهل مسلم و صبى يهودى. المهم جبت الكتاب و مضيته. دلوقت بديت قراءه فيه وواضح إنه كتاب حلو ..
كانت هذه هى نهاية رحلتى ف معرض الكتاب .. روحوا هاتوا شوية كتب حتى لو كانت غاليه .. وزى ماعلمونا فى إبتدائى "الكتاب خير صديق" !!