Tuesday, March 11, 2008

إستفتاء الميسيحيين و أخوتهم فى الوطن

من كام يوم إتنين من المدونين إللى بتابعهم عملوا دعوه لإستفتاء عن علاقة قطبى الوطن ببعض

فلنتعد الطبيعى قال : مشوار الحرب الأهليّة يبدأ بـ...!؟

و القهوه العايه قالت : مسلم؟؟؟ ولا مسيحي.؟؟ الحضري هو السبب (معا امام الله)

أرجو من الجميع المشاركه
لو كنت من دشنا روح هنا
و لو كنت من ديش العدو روح هناك

و آدى نموزح الإجابه :

----------------------------------------------------------------------------

تعارف مبدئي - السن؟
من 25 لـ 30 سنة

تعارف مبدئي - المهنة؟
باشمهندز

تعارف مبدئي - الجنس؟
ذكر

تعارف مبدئي - المستوى الدراسى؟
تعليم عالى (ياما كان نفسى أكتب ماجستير بس أهو كله نصيب)

تعارف مبدئي - الهويا ت( ما تفعله فى وقت الفراغ)؟
الفرجه على أنيمى
قراءه
التجول فى فلكر و الفرجه على الصور إللى كانت أحب أصورها
اللعب مع العيال
سماع الميتال و الكلتك

تعارف مبدئي - البرامج التلفزيونية التى تشاهدها / القنوات التى تتابعها؟
طول أيام الإسبوع من غير تلفزيون - الإنترنت أحسن
فى الأجازات بأكون "بطاطساية كنبه" بأتفرج على ذا موفى تشاننيل

تعارف مبدئي - اهتمامات أخرى؟
هل ممكن تحصر إهتمامات بنى آدم فى سطرين ؟؟
ممكن نقول الفلك , الأديان , الفلسفه , الفن , التاريخ ....
كل الحاجات إللى نفسى أعملها و مافيش وقت (إرجع للهوايات عشان تعرف أنا بعمل إيه)

تعارف مبدئي - محل السكن ؟
مصر - بين القاهره و المنصوره

ليك أصدقاء مسلمين؟ وإن كان هل علاقتك بيهم نفس علاقتك باصدقائك المسيحيين؟ ولماذا؟
أيوه
أنا شخصيا الدين تأثيره قليل جدا فى الصداقه
هممم,يا ترى إيه أهمية الدين فى الصداقه ؟؟ ممكن نقول عشان يبقوا فاهمين بعض و جايين من خلفيه مشتركه. بس بالنسبه لى إحتمالية ضعيفه إن حد يبقى فاهمنى عشان من نفس دينى.
ميزه للأصحاب المسلمين عن المسحيين : ممكن تدخل فى نقاش قوى عن موضوع مثير للجدل (زى الحجاب) و تسمع آراء غير إللى متعود عليها. ده بيبقى مسلى جدا و أحيانا (لكن قليل) مفيد
ميزه للأصحاب المسيحيين عن المسلمين : ممكن تقعدوا مع بعض و هاتك يا شكوى على المواضيع إللى صعب تنتقدها أدام أى صاحب مسلم خايف على مشاعره (زى الحجاب برضه !!)
ملاحظه هامه : فى اليومين دول الأهل بيشجعوا أولادهم على الصداقات من نفس الدين أكتر من الصداقات المختلطه. ده بيتم بوضوح و بدون خجل من ناس متفتحين جدا و مقتنعين إن المسلمين ميت فل و أربعتاشر و كل حاجه. أظن إنه جزء من ثقافة "نحوّط على ولادنا"

ممكن تبات ليلة عن صديق مسلم؟ وممكن تسمح لاختك أو بنتك تبات عن صديقة مسلمة؟
أيوه
Been there done that already !
بس ماتفهاموش غلط
البيات عند الأصدقاء درجه قويه من الصداقه. ممكن ناس كتير ترفض البيات مش للبيات فى جوهره بس لعدم إرتياحهم إن الصداقه توصل للعمق ده. و ده يرجعنا للنقطه إللى فوق
إظن مع أولادى (ولاد أو بنات) ممكن يبقى إعتراض عن الصديق نفسه بس مش دينه
أختى عندها أبوها هما أحرار فى بعض (بس أظن الراجل الطيب هايتفق معايا)

هل بتمتنع عن الأكل في رمضان في الشغل؟ وشايف ان ده مشاركة ولا عشان تتجنب نظرات أو انتقاد؟
السؤال ده على الوتر !
أنا "بأتجنب" الأكل فى رمضان فى الشغل .. ماعادا لما مايكونش حد شايفنى (أو جعان جدا أو خرمان شاى)
السبب ؟ بيتراوح مابين "إحترام مشاعرهم" و "تجنب الإنتقاد" حسب الموقف
بس أيوه, أحيانا الموضوع بيبقى مجرد تجنب نظرات الإنتقاد.
ممكن اقول إنى عايش الموضوع ده من يوم ما إتولدت (او الأدقّ : من يوم مارحت مدارس) و دلوقت مجدر فكرة الأكل فى رمضان فى العلن بتسبب لى عدم إرتياح مش معقول
زملاء كتير مسلمين بيأكدوا إنى أشرب و آكل براحتى و مافيش مشاكل (معظمهم من نوعية "إحترام مشاعرهم" إللى فوق)
لازم أعترف كمان و أقول إنى بأعد الساعات عشان رمضان يخلص و أقدر اشرب كوباية الشاى بتاعتى بمزاج و أنا بأشتغل.

هل تتحرج من نطق كلمة مسلم في الكنيسة؟ أو تعبر عن إنك مسيحي قدام مسلمين؟ ولماذا؟
لازم أقعد أفكر شويه عشان أفتكر آخر مره نطقت فيها كلام فى الكنيسه
ﻷ أبدا .. مافيش إحراج ولا حاجه
موضوع إعلان إنى مسيحى بيكون محرج : عادة موقف إعلان الديانه بيكون موقف قوى دراميا . تقيل و تحس أنك محتاج موسيقى تصويريه بعد كلمة "أنا مسيحى". برضه دايما بأقولها فى مواقف بطبعها تقيله (مثلا : فى تاكسى و السواق بيشتكى ليك من النصارى و إللى بيعملوه)
كتير بأستمتع بالعكس (مسيحيين يظنوا إنى مسلم). يمكن عشان ده بيرضى غرورى و إنه مش من السهل حد يعرف جواى إيه.

هل دخلت جامع قبل كده؟ وكان ايه شعورك؟
بصوره عامه عدم الإرتياح, و كانى مش المفروض أكون هنا

هل اتعرضت لاضطهاد قبل كده بسبب انك مسيحي في المدرسة/الجامعة أو الشغل؟
أنا هاجاوب بلأ .عشان قد ما أفتكر ماحصلش إن حد ظلمنى بصوره مباشره بسبب الدين.
بس إيه هو تعريفك لكلمة إضطهاد ؟؟
أنا مانلتش إكليل الشهاده (على الإقل لحد دلوقت) ولا إتسيب عليا أسود و نمور (برضه على الأقل لحد دلوقت)
بس مره تانيه : إيه هو الإضطهاد ؟ يعنى مثلا من فتره كانت الدنيا هايصه على ولدين مسيحيين فى إعدادى أبوهم أسلم و بالتبعيه لازم هما كمان يكونوا مسلمين (أو بالأدق : يحلوا ورقة الدين الإسلامى فى الإمتحان). أنا بأعتبر نفسى أضطهدت فى الموقف ده.
برضه بأعتبر نفسى أضهدت لما درست تاريخ مصر بين كليوباترا و الفتح العربى فى صفحه واحده من كتاب المقرر و لما كبرت عرفت إنه تاريخ كبير و يبيض وش أى مصرى. بس ياخساره بيتكلموا فيه عن الناس الغلط.
مش هاكون ممل و أتكلم عن تراخيص الكنايس

لو حد دخل عليك وقال (سلامو عليكم) بترد تقول ايه؟ وايه رد فعلك لو قلت (مساء الخير) وكان الرد و(عليكم السلام)؟
حلو السؤال ده
أنا بأرد "و عليكو السلام" و أظنها عيب أوى لو رديت باى حاجه تانيه
لو حد رد على مساء الخير بتاعتى بعليكم السلام بأحس بالإهانه بس بأسيبها تعدى
ناس كتير مسيحيين بتصر على صباح و مساء الخير بصفتهم جزء من الهويه المصريه بالمقارنه بالسلام عليكم الإسلاميه .. بس هى يعنى جت على دى ؟
ناس تانيين بيقولوا "السلام لكم" بصفتها التحيه المسيحيه .. دول بأحب أنبههم إنه ممكن أوى فى ترجمه تانيه للإنجيل تبقى مكتوبه "السلام عليكم"
و من هذا المنبر أود أن أناشد كل إخوانى الأقباط بأن يحذوا حذوى .. ماهو مش طاليه نعمل حساسيات على كلمتين هايفين و المشرحه مش ناقصه قتله

ماذا كنت تفعل حينما تضطر لحفظ آيات من القرآن في المدرسة؟ هل كان يضايقك ذلك؟
أبدا على الإطلاق !!
أنا كنت بحب محفوظات القرآن .. القرآن كان أسهل بكتيير من محفوظات الشعر.
فيه حاجات كتير فى الآيات دى كانت ممتعه و مثيره لتفكير طفل صغير لسه بيتعلم يعنى إيه أديان مختلفه
ده غير إنه بيدينى رؤيه أعمق للأسلام بالمقارنه بزمايلى المسلمين إللى ماكانوش عارفين الإنجيل مكتوب من اليمين للشمال وللا العكس !
عارفين ؟ لو حد عايز يعمل مؤامره ضد المسيحيين فى البلد يبقى ضرورى أول حاجه يشيل الآيات دى من المقررات
أنا فاكر مره و أنا فى إبتدائى طلبت من أبويا يسمعلى قطعة محفوظات من القرآن فراح سابنى و قعد هو يقراء فى شرح الآيات
كمان مش هيبقى عندى مشكله إن أولادى يحفظوها بس هاقول لهم حاجه مهمه: "خلوا بالكم أن مش ضرورى الكلام ده يكون صح و مش ضرورى يكون غلط, لازم تعرفوا لوحدكم" .. أظنى هاقولهم نفس الكلام عن الإنجيل


نهاية المجموعه الأولى


0 Comments:

Post a Comment

<< Home