لو أعيش للأبد

لو لى ألف مليون حياه كنت قضيت واحده منهم عالم فلك و التانيه صياد فى أعالى البحار
و جايز كمان واحده فنان فقير و أكيد حوالى ألف واحده منهم مدرس للأطفال

لو الزمن مش محسوب عليا و وقتنى هنا مش محدود كنت لفيت العالم ماشى على رجليا
كنت إتعرفت بكل راجل ,ست و طفل فيه
كنت دخلت من كل باب و جربت كل شغلانه
كنت إتعلمت لغات الأرض و السما
كنت زرت كل معبد و صليت لكل إله
كنت قريت كل كتاب إتكتب و شفت كل صوره إترسمت

بس للأسف .. هو عمر واحد و عمر قصير كمان
لازم أحسب كل خطوه و مضيعش وقتى فى حاجات فارغه
هو عمر واحد و لو راح مالوش تانى
يعنى لازم أشوف أضمن طريقه أعيشه بيها فى أمان
يعنى مافيش داعى لمغامرات خطيره

بس لو لى ألف مليون حياه .. لو أعيش للأبد

مش خوف من الموت ولا حاجه
بس خوف من الزمن .. والحياه

عن الجمال

مش يمكن الدنيا جميله بجد ؟

و فينا العيب مش فى حد ؟

معظم الوقت أنا مش عايش *فى* حياتى إنما *عن* حياتى.
مهتم بالتفاصيل و مشغول بيها عن الأصل.

ياترى هجيب منين قسط الشقه الجاى و ناسى أد إيه أنا سعيد بإنى بأحط كل قدراتى فى حاجه أنا فعلا عايزها
الشغل و مشاكله و حواراته و ناسى إد إيه أنا حابب الشغلانه دى و إن ده هو مكانى تحت الشمس

الجملتين إللى فاتوا بيلخصوا معظم وقتى : الشعل و الفلوس .. اللعنه إللى لعن بيها ربنا آدم
هل هى لعنه فعلا ؟ لا أظن
الوقت إللى فعلا بأكون حر فيه لما بأبرمج .. لما أفكارى تتطلع فى صوره حاجه بتتنفس و تتحرك

هو الإنسان عايش ليه ؟ يعنى إيه هو هدف الحياه ؟
أنا مش عارف.

جايز السؤال ده مش مهم و مالوش معنى أصلا, ماهو يعنى كده كده إحنا أهو عايشينها

الفتره دى أنا "سكران" من الجمال. و زى السكرانين مش عايز حاجه إلا إنى أفضل سكران كده
"يا سيد جيد أن نكون هنا, فلنصنع ثلاث خيام"

و زى السكرانين أكيد هفوق و أرجع تانى أسأل و أشتكى
"أنا لما بنام بأحلم و بأعيش و لما بأفوق مابفوقش بموت"

الخمر إللى سكرتنى هى صوره لطفل صغير شوفتها على فليكر. مافيش فايده من إنى أحط رابط ليها هنا لأنها مش مفتوحه للكل ,فقط للأصدقاء إللى المصوره إعتبرتنى منهم, و برضه مش هاعيد نشر الصوره هنا إحترما لها و لخصوصيه إبنها.

الصوره لولد واقف فى جدول بيتأمله وهو بيمر من حوالين كعبه. الصوره كلها غامقة ماعدا جسم الولد الفاتح كأنه تمثال إله إغريقى من الرخام. الولد واقف ,مايل شويه عكس إتجاه الجدول عشان يوزن نفسه, بهدوء مذهل و كأنه بيقول لينا كلنا إن كل حاجه فى الدنيا كويسه.. مافيش داعى للقلق أو الخوف .. كل حاجه زى ماهى مفروض تبقى.

الصوره ,زى ما واحد علق عليها, مش ناقصها غير جناحين.

من أيام بسيطه ماكنتش عارف بوجود صوره زى دى. فيه جمال كتير فى الدنيا إحنا مش عارفينه.